Little House On the Prairie 🏕️

සමහර නිර්මාණ ජීවිතෙ විවිධ අවස්ථාවල ආයේ ආයේම  රස විඳින්න කියලා කතාවක් තියෙනවානෙ... කාලෙත් එක්ක අපිට ඒ දේවල් දැනෙන විදිය වෙනස් වෙන්න පුලුවන් නිසා.

අවුරුදු එකොළහක පුංචි කෙල්ලෙක් විදියට Little House කියවපු මට, සීරීස් එක බලද්දී දැන් ලෝරාට වඩා, ලෝරාගේ අම්මා කැරොලයින් ව දැනෙන්න පටන් ගන්නවා. තමන්ගේ සතුට සැනසීම, ආදරය, පවුල හැමෝම හිටපු විස්කොන්සින් මහා වනය අතෑරලා දාලා, ජීවිතේම ආවරණය කරපු ගැලකට පටවාගෙන, අප්පච්චීත් එක්ක ඕනිම දේකට මූණ දෙන්න බලාගෙන එළියට බහින්න එහෙම ලේසි පහසු කාන්තාවකට පුලුවන් වෙන්න බැහැ.

   විස්කොන්සින් අතෑරලා ඇය එන්නේ ඇගේ හිතේ ලොකූ බියක් ඇති කරපු,නන්නාඳුනන ඉන්දියානුවෝ ඉන්න,  වෘකයො පිරුණු තැනිතලාවකට. කැන්සාස්.  කිසිම අදහසක් නැතුව වර්ඩිගිරිස් ගංගාවට බහින චාල්ස් ඉන්ගල්ස් ඇතුළු පවුලම ඉන්න ගැල, ගඟ මැද්දේදි පෙරලෙනකොට  තමන්ගේ මුළු ශක්තියම දාලා ගැල ගොඩට ගන්න චාල්ස්ට උදව් කරන්න ඇයට සිද්ධ වෙනවා. ඒ වගේම තමන් මොන තරම් බයකින් වගේම නොසන්සුන්කමකින් ඉන්නවද කියලා ඇය ලෝරාටවත්, මේරිටවත් පෙන්නන්නේ නැහැ.

  ඉන්ඩිපෙන්ඩන්ස් නගරයට ආපු පළවෙනි දවසේම එහි තැපෑලක් හෝ පාසලක්  නැති බවත්, හැමදේකටම වඩා  කෙල්ලො දෙන්නා සහ මුළු පවුලම ඒ ඉමක් කොනක් නැති තැනිතලාව මැද වෘකයන්ගෙන් පරිස්සම් කරගත යුතු බව ඇය තේරුම් ගන්නවා.

   නිවසක් හදන්න  ඉඩමක් බලන්න උදේ පිටත් වෙලා ගිහින් පහුවදා වෙන තුරුම ගෙදර නොඑන අප්පච්චී එනතුරු රයිෆලයක් ලඟ තියාගෙන,  මහා තැනිතලාවක් මැද්දේ, තමනුත්,  ලෝරාවත් මේරිවත් වෘකයන්ගෙන්, ඉන්දියානුවන්ගෙන්, නන්නාඳුනන මිනිස්සුන්ගෙන් ආරක්ෂා කරන්න හැම තැනකදීම ඇයට සිද්ධ වෙනවා... (කොහොමත් අපි කියවන ලිට්ල් හවුස් කියන්නේ සැර බස්සලා ලෝරා පුංචි දරුවන් වෙනුවෙන් ලියපු සිරීස් එකක් නේ)

     මේ හැම දෙයක්ම එක්ක, පළවෙනි episode එක අවසන් වෙන්නත් කලින්ම මං එක දෙයක් තේරුම් ගන්නවා. ඉන්ගල්ස් පවුලේ අරටුව වෙලා තිබුනේ Caroline Ingalls. ඇය සැලුනා නම් චාල්ස්ට ඔහුගේ අරගලය කරගෙන යන්න බැහැ. ඇය හැම තැනකම ඔහුට නිහඬව සහය දෙනවා මිසක් වචනයක්වත් කියන්නේ නැහැ.  අර ලෝරා පොතේ කියනව වගේම, අම්මා ගේ ඉවසීම, පුදුමාකාර විදියට ඇගේ මුව වටා තදින් බැඳී තියෙනවා. 

   කිසිම වේලාවක තමන්ගේ සැමියා ව මෙල්ල කරගන්න තියුණු හඬකින් "චාල්ස්.." වැඩිම වුනොත් "මගේ දෙයියනේ චාල්ස්.." මිසක් ඊට එහා දෙයක් නොකියන අම්මා ගේ චරිතය, ඇය අම්මා පමණක් නොවී කැරොලයින් ඉන්ගල්ස් කියන ගැහැණිය කියන කෝණයෙන් හරි අපුරූවට සිරීස් එක පුරාම පෙන්වන විදිය,මේ වනතුරු නොහිතපු පැත්තකින් අපිට මේ කතාව දිහා බලන්න සලස්සනවා. ඒවගේ පරිසරයක, ඒ දරා ගැනීම සහ ධෛර්යය මහ පුදුමාකාර එකක්.

ඒක එහෙම නොවෙන්න, චාල්ස් ඉන්ගල්ස් විතරක් නොවෙයි, අපට කියවන්න Little House සීරීස් එකක් ලියන්න ලෝරා ඉන්ගල්ස් කෙනෙක් පවා නිර්මාණය නොවෙන්න තිබුණා කියලා අද මට හිතෙනවා.

වණ අරණක කුඩා නිවසේ එක තැනක, කැරොලයින් ම ලෝරාට කියනවා වගේ...

"හිතන්නකෝ ලෝරා, මං වළහෙකුට පාරක් ගැහුවා නොවැ.." 🫢

To this beautiful, Unbreakably strong women.. Caroline Ingalls නොහොත් ලෝරාගේ ආදරනීය අම්මාට! ❤️🥂🏕️

#මානි