සොහොන් කොතේ නුඹේ නමට....

"අතීතය මංතලාවේ අපි
වෙන්වෙලා බොහො දුර ගියාවේ..
ඉඳල හිටලා පෑරුනා හිත්
කඳුලු ඇවිදින් සැඟවුනාවේ...

මංසලෙන් මංසලක් ගානට
ජීවිතේ වකවානු ගෙවුනේ..
අලුත් හදවත් අලුත් පැතුමන්
අපෙ දිවියට පාලු මැකුනේ...

අතින් අත පැටලී ඇවිදගිය
මතක මාවත් තවත් ඇත්තේ..
ඔබත් මා මෙන් අලුත් පැතුමන්
දරා බොහො අය එහිද ඇත්තේ...

කාට කාටත් හොරට රහසින්
කාලයත් ගෙවිලා ගිහින්නේ..
මටත් පෙර මේ ලෙසින් යන්නට
කවුද ඔබහට වරම් දුන්නෙ...

තවම රඟදෙන මතක පොත මැද
ඔය සිනාවන් බැලුම් හෙලුවේ..
මාද මහලුය එදා මෙන් නැත..
වෙහෙස ඇත මට සතුට නැත්තේ..

එකට යන්නට පෙරුම් පිරු ඒ
දිවිගමන වෙන් වී ගියාවේ..
හැකිද ඔබහට එහි රැඳෙන්නට
නොබෝ දිනකින් මමත් එන්නෙ... " 😊

#මානි

"අතරමං වී ඈ"

"නිරන්තර ලඟ රැඳෙන
ගතු කියන ඇගේ හිත..
විත්තියද පැමිණිල්ල
සාක්ෂිය නඩු අහන..

නොසන්සිඳි විඳවිල්ල
දුරක ගිය ඈ සතුට..
තවම බිඳී සිත් පතුල
අරමුණක් නොමැති හැඩ..

කතරකට දියබිඳක්
නොමගේන වලාකුළු
සමච්චල් සිනා පා..
පැනදුවන අපූරුව..

අතරමං සඳවතිය..
ඉකිබිඳුනු ඇඟෙ හඬ..
රාත්‍රිය සසල කර
ඇදී ගිය දුර බොහොම.. " :)

#මානි

නොදුටු "මනාලි" ය

"ඇද හැලෙන හිම පියලි
              හීනි හඬ නගාගෙන..
දොරින් දොර සීතලට
             මදින් මද තුරුලුවෙන..
විසල් මේ අහස යට
            පැතුම් පොදි පාකරන..
මුව සිනා ගෙනිවිත්ද
                 දුරුතු මස මද පවන..

පැතුම් පොදි මලු බැඳන්
                    සීතලම පවන් මැද..
ගිරි සිකර ඒ හිමේ
                    ගිලී ඉකි බිඳිනවද..
අතීතයේ මතක පොදි
                    කැටි ගැසී රිදෙනවද..
මා නොදුටු "මනාලි" ය 🌄
                      තව සිනා සලනවද..😊

ගිරිසිකර මැදින් එන
                            නත්තලේ සුබ පැතුම..
විසල් හිස් අහස් ගැබ
                            ලියවිලා සතුට පෙම..
සීනී හිම කැටි මතට
                            පෙම් බදින ක්ෂිතිජ ඉම..
තව තවත් පේවියන්
                           දුරුතු මහ කවි පෙමට... " 😊
                   
   #මානි

(මනාලි = ඉන්දියාවේ හිමාචල් හි මනාලි කඳුකරය )

දුර ගිය හීන 🌾🐾

නුඹ  නොදන්නවාදැයි
නොදනිමි..
මම තවම සොයනා
අරුත..
කවිපදයක...
නුඹට වැටහෙනවාද
නොදනිමි..
හිත යටින් වැයෙනා
ගී පද..
සේකරත් ලිව්වාලු
කවි පද..
ලෝකයම තනි
යායකට ගෙන...
ඉකි බිඳින එක්
බිඳුනු හිතකට..
අස්වැසිල්ලක් වූවාද
කවි නුඹ..
නුඹෙන් ඇරඹී..
නුඹට ලියවී..
නුඹෙන් අවසන් නොවූ
කවියක..
එක්ම එක
නැවතීමේ ලකුණක
නතර වී මඟ බලා
ඉමි මම... "😊

#මානි

"Im broken" 💔

"අඳුරු මතක හිත අද්දර
                   බැලුම් හෙලන හින්දා..
දිවා රෑම කඳුලු බිඳින
                 ඇස් අද්දර රන්දා..
බියෙන් ගැහෙන ජීවිතයක
                  නව අරුනලු කැන්දා..
හෙට උදෙන්ම ඉර පායන්
                  පැතුම් පොදක් රන්දා..

එක් හැඟුමක එක් සුසුමක
               නුඹේ නමින් ලියලා..
කෑලි වලට කැඩී වැටුනු
             හදවත ඉකිබින්දා..
තවම හඬන ලොව නොදන්න
               සිනාසලන හින්දා..
හිත දිරි ඇති ඈ සැමදා
                  ජීවිතයම වින්දා..

කඳුලු මතක රිදවූවත්
           ජීවිතයම සැමදා..
කොතනක හෝ හැමවිටකම
         සිනහව සුව වින්දා..
ගල් මුල් මැද ජීවිතයට
         සතුටු පැතුම් කැන්දා..
ගලායන්න ගඟක් විලස
         හැඩවැඩ වී රැඳෙනා...  " 😊

#මානි

අමරය "අමර සර" 😔

"සත්සර රාව කන්කලු නද දුන් පෙරදා..
ඔබේ අනුහසින් වීණා තත්සර නැගුනා..
පටු අදහසින් ලෝකය මුදවන පෙමිනා..
රත්න දීපයම නුඹ නාමෙන් වැයුනා...

සරනා අමරසර ලකඹර පෙර දවස..
මුමුනා අමර නද ලක්මව සසල කල..
යුගයක් එකලු වී සත්සර රාව නැග..
දෙසවන් සනසවා සැමසිත් පහන් විය..

නුඹ අතැඟිලි පහස ලැබ තත් ඉකිබින්දාද...
ඒ ඉකිබිඳු මැදින් දේශය නැලවී යාද..
යලි යලි  වයන්නට දී සත්සර අනුනාද..
ගාන්ධර්වයාණෙනි ඔබ යලි එනවාද...

නිහඬය වීණා පත් අද නැත නාද දීදී..
නුඹ හඬ ඇත රුව නැත නෙත් කැළුම් දිදී..
නිහඬය යශෝරාවය ලක් මව කඳුලු බිඳී...
අමරය "අමර සර" නිල් ලකඹර සදා රැඳී.. " 😔😔

#මානිගේ_ලෝකය

සඳ ඇති රෑක..

"සඳ පායා එන සද අර දුර ඈත..
වලාකුළු කැටි ඇත මට පා මද හාස..
හිමිහිට මුමුණලා රෑ තව කව් ගීත..
අහසත් හැඩවෙලා පුරහද ඇති රෑට..

තරු එලි මගකියන සයුරේ රළ පෙලට..
මතකය ගලා විත්  හිත් අග දුර දාක..
සඳ එලි මැදින් තනිකම විසිකර දුරක..
ගිය අඩි පාර අද මැකිලා රළපෙලට..

සත්සර රාව නංවන තුරු පෙල අතර..
සැඟ වූ කතා නෑසේ මට අතු පතර...
කිව හැකි  නම් මේ තුරු පෙල ඇති මතක..
මියගිය සිහින යලි දලු ලා වැඩෙනු ඇත...

නිහඬ රාත්‍රිය සතු සන්සුන් නිසල බව...
බිඳ දා ඇද වැටුනු සීතල කඳුලු කැට...
දියවී වැටී අරගෙන ගිය මතක රළ..
පිසදා හෙටත් හිරු අහසට නැගෙනු ඇත.. " 😊