මහ වන අරණේ පුංචි කතුවරිය

  මීට වසර ගණනාවකට පෙර මඩොල් දූවට එහා පොතක් නොකිය වූ, පුංචි අකුරු වලින් සමන්විත ලොකු පොත් කියවීම පිලිබඳ එතරම් තැකීමක් නොකල, එහෙත් අම්මා විසින් සතියක් පාසා ගෙනවිත් දුන් ශිෂ්‍යත්ව විභාගය වෙනුවෙන්  ලිය වුනු හපනා පත්තරයේ පල වූ සති පතා කතාංගයත්, ඊටත් මාස කිහිපයකට පසු අලුත් පාසලට යාමට මත්තෙන් ලැබුනු විජය සහ මිහිර පත්තර වල පල වූ ලිපිත් හෙමින් හෙමින් කියවන්නට පුරුදු වූ කෙල්ලක සිටියාය.

ඇයට සහෝදර සහෝදරයින් සිටියේ නැත. ඇගේම මනෝ ලෝකයක ජීවත් වූ මේ පුංචි කෙල්ලට ඒ දවස් වල තිබූ ලොකුම උණ වූයේ අලුත් ඉස්කෝලය විතරමය.

මේ අතර වාරයේ එක්තරා වැසි සහිත සන්ද්‍යාවක, කුමක්දෝ හේතුවකට කුරුනෑගල නගරයට ගිය ඇගේ අම්මා, එක්වරම නිවසට පැමිණ මෙන්න මේ පොත හොඳද බලන්නැයි පවසා ඈ අත පොතක් තැබුවාය. ඇඳේ වැතිරී යාබද ගසක වැස්සෙන් තෙමී පෙඟුනු දෙමලිච්චෙකු නරඹමින් සිටි මේ පුංචි දැරිවිය සැලකිලිමත් බැල්මක් යොදා අතට ගත් පොතේ කවරය වනාන්තරයක ගස් වලින් වටවූ පුංචි නිවසක වහලයකින් සැරසී තිබුනු අතර එහි නම සටහන් වී තිබුනේ "වන අරණක කුඩා නිවස" ලෙසිනි.

පලමු පරිච්ඡේදයට අසල්වැසි පිටුවේ බෙල්ලට දික් වූ කොන්ඩයකින් යුත් පුංචි ගැහැනු දැරිවියක් පැන පැන ඇවිදින්නාක් මෙන් වූ චිත්‍රයකි.එහිම ඈ පිටුපස තොප්පියක් පැලඳ ඇගේ සහෝදරිය මෙන් තවත් පුංචි ගැහැනු ලමයෙක් ඇවිද ආ අතර, ඒ පිටුපසින් ඇගේ දෙමාපියන් විය හැකි තරුණ යුවලක් ඇවිද එන අන්දමේ සිතුවමක් විය.
ඒ සිටින්නේ බාගයක් බීපු ඇබිත්තං පැණි රස සයිඩර් බෝතලයක්  ලෙස අප්පච්චි ආදරෙන් හැඳින් වූ දඟකාර ලෝරාත්, ඇගේ නිල්වන් ඇස් ඇති සුන්දර විනීත සොහොයුරිය වූ මේරිත්, සෑම රැයකම රවුකිඤ්ඤය වැයූ ආදරනීය අප්පච්චී චාල්ස් සහ ඉතාම රසවත් කෑම සෑදූ සුන්දර රුවැති අම්මා කැරොලයින් බවත් වටහා ගන්නට මේ පුංචි කෙල්ලට ගත වුයේ සුලු කාලයකි.

හිකරි දුම් ගැසූ මුවමස්ද, පෙපින් විලේ මාළුන් ද, අවුරුද්දකට වරක් ලැබෙන රෝස් කල ඌරු වලිග ද, අම්මාගේ ගෙවත්තේ නැවුම් එලවළුද, සීනී හිම කාලයට සෑදූ මේපල් පැනිද, සීයාගෙ නිවසේ මනරම් නැටුම් උත්සවද, එලිසා මහම්මා සහ පීටර් මහප්පාගේ නිවස අද්දර සිටි අඳුන් දිවියාගේ කතන්දරද, ආදරනීය ජැක් ද, ග්‍රීස්ම ඉර්තුවේ අස්වනු නෙලන විට මැරෑටි වැඩ කෙරූ සහෝදරයා චාලිද, අම්මා බටර් හදන දවස්, රෙදි සෝදන දවස්, පාන් පුලුස්සන දවස් හා අප්පච්චි නගරයට ගොස් හම් විකුනා තෑගි ගෙනෙන මනරම් දවස් වලින් සන්තර්පිත වූ ලෝකයක මේ පුංචි කෙල්ල කොතරම් අතරමං වූ වාද යත්, ඈ විකොන්සිස් මහ වනයේ සිට යලි සිය නිවසට ආවේ ඇගේ අම්මා රෑ කෑමට අඬ ගැසූ ස්වරයෙන් පසුවය.

ඉතින් එදායින් පසුව ඈට ආපසු යෑමක් තිබුනේ නැත. ඇය පොත් වලට ආදරය කරන්නටත්, ඈ පොත් ලෝකය තුල අතරමං වන්නටත්, පොකට් මනි එකතු කර පොත් ගන්නටත්, පන්තියේ වාර විභාග වලින් හොදම ලකුනු ගත් විටත්, සිය උපන්දිනවලටත්  ආදී එකී මෙකී නොකී සෑම විශේෂ අවස්තාවකම පොතක් තෑගි වශයෙන් ඉල්ලන්නටත්, සිය පලමු වැටුපෙ සිට සෑම මසකම එක පොතක් හෝ ගන්නා කාලය දක්වාම පොත් වලට ඉමහත් ලෙස ආදරය කරන්නියක බවට පත් වූවාය. ඒ ලෝරා මැවූ රසවත් ලෝකයත්, ඒ ලෝකයේ රස නොමරා වඩාත් රස වඩවා පරිවර්තනය කල ගංගා නිරෝෂනී සුදුවැලිකන්ද මහත්මියට පිං සිදුවන්නටය.

එතනින් ඇරඹී ලෝරා සමඟ රතු ඉන්දියානු ප්‍රදේශයේද, මිදි ඔය අසබඩද, රිදී විල් තීරයේ මිනින්දෝරු නිවාසයේ ද, නගරයේ නත්තල් ගස්ද, නපුරු නෙලී ඕල්සන් සමඟ දබර කරගන්නට ද අම්මා ඊලඟ පොත ගෙනවිත් දෙන තුරු බලා සිටිනවා සේම, පොත් කවර වල විස්තර සඳහන් වූ කතුවරයන්ගේ වෙනත් කෘතිද එකින් එක එකතු කරන්නටත් පුරුදු වූ මේ කෙල්ල, ඇගේ අලුත් ඉස්කෝලේ පන්තියේ යෙහෙලියන් හා මිතුරු වූයේද මේ පොත් ඔවුන් හා බෙදා ගනිමිනි. Book Club ගැන සංසාරයක් නොදැන සිටි කාලයක පවා ඔවුන් නොදැනුවත්වම  ඒ සංකල්පය ක්‍රියාවට නංවා තිබුනේ එසේය.

ඉතින් මහ වන අරණේ පුංචි කතුවරිය ඉක්මනින්  කියවා අවසන් කර නැවතත් වන අරනක කුඩා නිවසේ සිට ලිට්ල් හවුස් කතා මාලාව නැවතත් කියවන්නට යාමට පෙර අවසන මෙසේ ලියමි..

හිතවතුනි, මහ වන අරණේ පුංචි කතුවරිය යනු ඔබ තුල සිටින පුංචි කෙල්ලන් නැවත අවදි කරවා බාල කාලයට ආපසු ඇවිද යාමකි.ජීවිතයේ රළු බොරලු මතින් දියව යන ඇතැම් ළදරුමය අහිංසකකම් නැවත හදවතට ලං කර ගැනීමකි. කාලයෙන් කාලයට ලෝරා අලුත් වී නැවතත් අප අතරට පැමිනිය යුත්තේ එබැවිනි. අපට අප මතක් කර, අතීතමය නොස්ටැල්ජියාවක ගිල්වා උණුසුම් හැඟීමකින් හදවත පුරවන්නට ඇයට හැකිය. ඒ ව්‍යාමය අත් නොහැර අල්වා සිටිනවාට මම ගංගා නිරෝෂනී සුදුවැලිකන්ද ට ස්තූතිවන්ත වෙමි. ගලින් ගලට පැන ගිය ඇතින්නියන් ගැන දරු නැලවිලි කියන යුගයක සිටින ලෝරාගේ පලමු රසික පරම්පරාවට ඒ සුන්දර අතීතය අනාගතයට රැගෙන යන්නට හැක්කේ එවිටය. මන්ද මගේ අම්මා දුර දිග නොහිතා ගෙනත් දුන් එක පොතක් මගේ කාමරයේ ඉඩ මදි වන තරමට ගොඩ ගැසෙන පොත් කන්දකට මග පෑදුවාක් මෙන්, වන අරණක සිටි එක් පුංචි කෙල්ලක් සියවස් දෙකකට මෙහා උපන් තවත් එක පුංචි කෙල්ලක පොත් කාවෙක් බවට පත් කලාක් මෙන්.. තව දහස් ගණනක් පුංචි පොත් කාවන් අනාගතයේ බිහිකරන්නට බැරි නැත!

ලෝරාට සහ ගංගාට ඉමහත් ආදරයෙන්

#මානි