"මේ පාර වෙසක් එකට මොකද පුතේ කරන්නෙ?? " 😊
අම්මා මගෙන් ඔය ප්‍රශ්නෙ ඇසුවේ කී වෙනි වතාවට දැයි මට මතකයක් නැත.එයට උත්තරයක් දීමට මට උනන්දුවක් තිබ්බේද නැත.මුලදි මුලදී නම් "ඔය මොකක් හරි කරන්න බැරියැ " කියා කීවාට මෙවර නම් මොකුත් කරන්නට මට අදහසක් ,උනන්දුවක් හෝ උවමනාවක් ඇති වූයේද නැත.ඒ තියා වෙසක් කවදාදැයි කැලැන්ඩරයෙන් බැලීමටවත් උනන්දුවක් මා සතු වූයේ නැත.😕අපරාදේ කියන්නට දුකක් නැත්තේ හිතවත්ම මිතුරු ආත්ම දෙක තුනකට "කවදද බන් වෙසක් ?? " යැයි ඇසූ විට ඔවුන්ද සුපුරුදු පරිගණක තිරයෙන් මඳකට හෝ ඇස් ඉවතට නොගෙනම "අනේ මන්දා" යැයි කියූ බැවින් මට වෙසක් ගැන හැඟීමක් හෝ ඇති වූයේ නැත. ☸
ඉස්සර නම් සිංහල අවුරුදු වලට පසු වෙසක් එනතුරු මන් ඉන්නේ ඇඟිලි ගැන ගැනය.ඒ නානාප්‍රාකාර වෙසක් සැරසිලි වලින් නිවස සැරසීම මගේ වසරකට සැරයක් උදා වන ලොකුම සිහිනය වන බැවිනි.✡️බකට් හැරෙන්නට උපන්තේකට වෙසක් කූඩුවක් අපේ නිවසට කඩෙන් නොගෙනාවේ ඒක ය.පාසල් ගුරුවරියක් වූ මගේ අම්මාත් මාත් වෙසක් සමරන්නට මුලින්ම ගසන්නේ මාස්ටර් ප්ලෑනක් ය.එය මාස්ටර් ප්ලෑනක් යැයි මා කියන්නේ මේකය.අටපට්ටම්ද,තරුද,✡️නෙලුම් මල්ද,දහ අටපට්ටම්ද එකී මෙකී නොකී සියලු වෙසක් කූඩු සෑම වෙසක් දිනයකටම නිර්මාණය කිරීම අපි දෙන්නාගේ ඒකායන අරමුණය.☺️
දින ගණනාවක් පුරා ගෙදර උණ පඳුරෙන් කපා ගන්නා උණ බට කපමින්, සුද්ද කරමින් කූඩු බැඳීම පටන් ගන්නේ ඊලගටය. මෙහි ඇති රසවත්ම සිද්දිය මේක ය.ගුරුවරියක් වූ ඈ ත්,පාසල් සිසුවියක් වූ මාත් සෑහෙන ගැම්මකින් යුතුව මේ කූඩු සැදීම පටන් ගන්නා බව ඇත්තය.ඊලගට පාසල් ගොස් අවසානයේ නිවසට පැමිණි වෙලේ සිට ඉවක් බවක් නැතුව කූඩු හදන්නට බට සුද්ද කරනා අප දෙදෙනා හෙට වෙසක් කියනා තුරුත් කරන්නේ බට සුද්ද කිරීම ය. 😁
අවසානයේ කූඩු හැදීමේ යෝජනාව කාගේ වුවද සියලු කාර්‍යයන් අවසන් කරන්නට වන්නේ තාත්තාටත් ,අයියලාටත් ය.ඔවුන්ගේ නිවෙස් වල කූඩු සෑදිල්ල පැත්තක තියා මගෙ කූඩුවල වැඩ ඉවර කරන්නට එනවා මදිවාට රෑ බෝ වෙන්නට පෙර එවා ඉවර කරන්නටත් අවැසිය.ඒ අතරේදී තවමත් පෙර මාස්ටර් ප්ලෑනටම වැඩ කරන්නට හදන මා "ඕක ඔහොම නෙමේ..මෙහෙම අලවන්නකො අයියේ.. " යැයි පඬිවදන් දෙන්නට ද ගොස් ..
"මොන මගුලක් ද ඕයී.. තමුසෙම හදාගන්නවකො එහෙනම්" යැයි බැණුම් අසනා වාර ද අනන්ත අප්‍රමාණය. 😂
ඒ අතර සම්බුද්ධත්ව ජයන්තිය සැමරීම උදෙසා ඒ වසරේ වෙසක් පොහෝ දිනයට අම්මාත් ,මාත් එකහෙලාම සත් පියුමන් සෑදීමට තීරණය කලෙමු.☺️කෙසේ හෝ සත් පියුමන් අප දෙදෙනා විසින් සෑදූ අතර ඉහත කී පරිදිම රාත්‍රිය උදා වී අවට නිවෙස් වෙසක් සිරියෙන් එකාලෝක වන තුරුම අපේ කූඩු අලවා අවසන් වූ යේ නම් නැත.විදුලි ආලෝකය ද සකස් කල අවසන් කල සොහොයුරන් දෙදෙනා ගේ ද මාගේ පියාණණ් ගේද ආදරණීය වදන් රැසක් අවසානයේ කෙසේ හෝ අප නිවස අසල මේ සත් පියුමන් වලින් සරසා ගන්නට හැකියාව ලැබුණේ අම්මාත් මාත් ඉමහත් සතුටට පත් කරමින් වුවද තාත්තාට අනුව නම්
"දෙන්නා ලොකුවට කූඩු හැදිල්ල පටන් ගත්තට අන්තිමට පණ යන්නේ මගෙනෙ'' යන ඇනුම් පදය නම් එදත් වැරදුනේ නැත.😁
එහෙත් එ ඇණුම් පද අතර ඔහු සිටින්නේ සතුටෙන් වග මම දනිමි.මන්ද වෙසක් පොහොයට කූඩුවක් සාදන්නෙ නැති අල්ලපු නිවසේ පොත් ගුල්ලන් දෙදෙනා නොසලකා මා ගැන මගේ පියා ආඩම්බර වන එකම දවස එදා වන බැවිනි.😉දවස් ගාණක් වෙහෙස වී සෑදූ කූඩු සුලඟේ සැලෙමින් පැද්දෙන විට දැනෙන සතුට වෙසක් කූඩූ එකට දාහක් කඩෙන් ගෙනත් එල්ලූවද ගන්නට බැරි බව මන් නොබියව සහ ආඩම්බරයෙන් කියන්නේ ද ඒකය. ☺️❤️
ඒ එදාය.ජීවිතයේ අමිහිරි කාල වකවානු ඇවිත් ගිය සමයේ වුවද මා වෙසක් අමතක නොකලෙමි.⏳ඇතැම් දේ නොසිතෙන්නට ඔලුව රිදෙන තුරු කල්පනා කිරීම උරුම වූවායින් පසුව එයින් මිදෙන්නට මා කලේ වැඩ වල යෙදීමය.අධ්‍යාපනයත්,ජීවිතයත් හැල හැප්පීම් මැද ගෙවී යද්දී වඩ වඩාත් පොතට ඇලුනු දිවියක් නිර්මාණය කරගත් මා පරිගණක තිරයත් ,ලිවීමත්,මුහුණු පොතත්,මාගේ කාමරයත් මගේ ලෝකය බවට කරගත්තෙමි. 📚✏️ වැඩ වවා ගැනීම කලාවක් කරගත් විට ඔබට එයින් මිදෙන්නට නොහැකිය.ලෝකයේ අනික් සියල්ලට වඩා තමන්ගේ වැඩම ලොකු කරගත් මා වටේ ඈයින්ගේ අමනාපයට බඳුන් වීමද නැවතුනේ නැත.මෙවර වෙසක් ආවේ ද එවන් කාලයකය.✏️😒
අවසන් කලයුතු අධ්‍යන කටයුතුත්,අවාසනාවකට සෙට් වූ රිපීට්ටුවකුත් නිසා මුහුණ නොරොක් කරගෙන රතු කට්ට පැන සිටින මට මේ පාර වෙසක් මොකටෙයි කියා සිතුනේ සති ගාණකට පෙරය.😏අම්මාගේ පෙර පැණයට හදවතින් නොරිස්සුම් පිලිතුරක් දී නිහඬව හිටියේද ඒක ය.හොස්ස ලඟින් මැස්සකුට හෝ යන්නට බැරුව මා ඉන්නා වග දන්නා බැවින් ඇය නැවත මගෙන් ඒ ගැන විමසන්නට නොආවේද මගෙ පීඩනය ඇය අවබෝද කරගත් නිසාද විය හැකිය.ඔය අතරේ වෙසක් පොහොයට පෙර දිනයද උදාවිය. ☸🌜
වෙනදාට වෙසක් පොහොයට සියලු සැරසිලි ගේන්නට තාත්තා සමඟ යන්නේ මම ය.අත් දෙකෙන්ම ලොකූ මලු දෙකක් ඔසවාගෙන ආඩම්බරෙන් ගෙදර එන්නේ වෙසක් එකට වැඩ පටන් ගන්නටය.මෙදා මට වගක් නොවූ හෙයින් අම්මා ඒ කර්තව්‍ය ඉටු කොට තිබෙන අයුරු මා දැක්කේ කන කැස්බෑවා විය සිදුරෙන් එලිය බලන්නාක් මෙන් කාමරයෙන් එලියට ඇදී ආ අතරතුරේය. 😶🌾
"ඔයාට වෙලාවක් නෑනේ.. මන් කඩෙන් මේවා අරන් ආවා.. " අම්මා කියයි.ඇය අත වූයේ කාඩ්බෝඩ් ඇසුරුමකි.
"මේ මොකද්ද?? " මට ඇසුනේ ඉබේටම ය.😕
"මේක් අර මන් ඔයා පොඩි කාලෙ හදන්නේ කාඩ්බෝඩ් වලින්...සෙලෝපේන් අලවලා.. ඒ වගේ.. මෙතන කූඩු 5ක් " ඇය කියාගෙන යයි. ☺️
(ඔය සෙලෝපේන් කූඩු වසරකට වරක් නව කූඩු නිර්මානයට අදහස් හොයන ඈ වෙසක් සැරසිලි කඩ ගානෙ ගොස් බලාගෙන පැමිණ එක් වසරක කල නිර්මාණයකි.)
"මේක් හදලා බකට් ටික් එල්ලමු.තාත්තා බල්බ් දායිනේ..ඒවා ලස්සනයි.හදපු කූඩුත් තිබ්බා.බස් එක් ගේන්න බෑනේ.. " 😕
මට ක්ෂණිකව ඇති වූ හැඟීම මොකද්දැයි කියන්නට මට තේරුමක් නැත.එය කේන්තියක්ද,දුකක්ද,මන් ගැනම අපුලක්ද මොන එකක්දැයි කියන්නට නොදන්නා මුත් මගේ උගුර නම් හිරවී ගොස් තිබුණි.කවර පුරා ගෙන ආ බොහෝ දේ අම්මා මට ඒ වන විටත් පෙන්වමින් සිටියාය.
එහෙත් උපතින් ලද ජාන වල රිදුමත්,එදා පටන් ඇදී ආ පුරුදුත් මට අමතක කරන්නට නොහැකිය.වැඩ ගියාවේ යකාට.. මම කියා ගතිමි. ☺️
"ඔය මොක ගෙනාවත් ගෙදර හදන වෙසක් කූඩුවක් මැරීගෙන හදලා එල්ලුවම දැනෙන සතුට ගන්න බෑ අම්මේ.. 😕වැඩ තිබ්බට කමක් නෑ.. ඔයා බට කපන්න.මන් එන්නම්.. හෙට රෑ වෙනකම් වෙලාව ඇති.. අපි කූඩු හදමු... " 😊😃
"ඇති යාන්තම්..ඔයාට එහෙම හිතුනා .. " සැනසුම් සිනාවක් පා අවසානයේ ඇය මට එසේ පවසා ඇදුනේ උණ පඳුර පැත්තට විය හැක . 😌😊
කාර්‍යබහුල වීම යනු අප අපවම අමතක කිරීම විය නොහැක.වෙසක් එන්නේ වසරකට එක පාරය.පිනට වඩා විලාසිතාවට වෙසක් සමරන ලෝකයක හෙට එක් බුදු වදනක් හෝ සිහිපත් වනවා නම් ඇතිය.අම්මා තාත්තා ත් අලෙවිකරණයේ ඉත්තන් වූ විටක ආගමට එසේ වීමේ කොයි අරුමයක් ද නැත.සියල්ල ලේසියෙන් කරගන්නට සිටිනා අපේ ඈයො අනාගතයේ කැරකෙන කූඩුව යූ ටියුබ් එකෙන් ඩව්න්ලෝඩ් කර ගෙන එය සිය පරිගණකයෙන් නිවස ඉදිරියේ ප්‍රදර්ශනය කර වෙසක් සැමරුවේ නැති නම් ඇතිය. 😏
එහෙත් වෙසක් යනු වෙසක් ය.එය සැමරිය යුත්තේ හදවතින්මය. ☺️ඒ හැඟීම් මුදලින් පිරිමසන්නටද නොහැකිය.ඔබ අද එසේ කලද කවදා හෝ ඔබේ දරුවා වෙසක් යනු කඩෙන් ගෙනා කූඩු එල්ලන, රෑ එලිවෙනතුරු කෑ කෝ ගසමින් ගමන් බිමන් යන,වන්දනා ගමන තවත් එක් විනෝද චාරිකාවක් වන,සරල සිංහලෙන් කීවොත් ආතල් දින කිහිපයක් යැයි අවබෝද කරගන්නවාට ඔබට කමක් නැතිනම් එසේ කරාට කම් නැත. ප්‍රතිපත්තිය මුල්කොට ආමිසය හා එක් වී එදවස සැමරූ වෛශාක්‍ය මංගල්‍ය ඒ භක්තිය හා ශ්‍රද්ධාව හා එක් වී සමරනවාද නැති නම් ඉහත කී පරිදි සම්බුදු තෙමගුල තවත් එක් කානිවල් එකක් කරගන්නවා දැයි සිතීමත් ඔබටම භාරය. 😕
"ඔබ සැමට පින්බර වෙසක් මංගල්‍යක්ම වේවා!! " ☺️
#මානි ✒️😊
No comments:
Post a Comment